واشوقا على بلدى

وا شوقاً على بلدى ..
شوق زولاً ولوف بكّاى ..
حليل يا ناس دعاش حلتنا يغشانى
عشان الشوق هلكنى براى...
طريت الدار بشارة خير
مع أم بشار
و برق ليلاً لمحتو بعيد
شلع ضوّاى...
و هاك ياخير وكت ما تمطر
الضحوية
و تسقى واطاتنا بى حنية
بحس بالخير معدى علينا ساير
جاى...
دخن قايم
معاهو سنابل الماريق
و داك الفول متلخبط بالويكة واللصّيق
يمجد فوق عظمة
الخالق السواى
و اشوقاّ ... على بلدى
شوق زولاً ولوف بكاى
حليل يمّة ...
ختت إيدا فوق رأسى
و قالت لى
تعال ياغالى قرّب جاى
بدور فى الخطبة السمحة بت الناس
أزغرد ليك
و أسوى الفوت
و أتّم الفرحة بيك ياعشاى !
قت ليها
سمح يمّة ...
عشان خاطرك
و عشان خاطر قليب هوّاى
...
أصلو السمحة يا يمّة
جدى ريلاً ...
بقدل جوّه فى جواى
و من يومى بدور السمحة
تبقى معاى
تقولا معاى
و ا شوقاً على بلدى
شوق زولاً ولوف بكّاى
ديار الشورى...
و النقارة...
و المردوم ..
و حس جرارى طول الليل علينا يحوم...
ديار القرعة
و المفراكة ...
و الحكّامة
و الهدّاى ...
واشوقاً على بلدى ... شوق زولاً
ولوف بكّاى...